هاجم الكاتب السوري أحمد قصار، الذي شارك في كتابة سيناريو مسلسل “الهيبة الرد” الذي يعرض حالياً، بطل العمل الفنان تيم حسن، موجها له انتقادات عدة تتعلق بما وصفه بـ”الارتجال” اثناء تقديمه شخصية “جبل شيخ الجبل” في المسلسل.
واول ما انتقده قصار هو استخدام تيم حسن لمفردات نمطية قديمة، مثل “ماتهكلو للهم” و”منتهية” برغم الجهد المبذول بالكتابة من اجل تحويل النمط الى شخصية جديدة بسبب عوامل عدة طرأت عليها.. كما انتقده بسبب ترداده كلمة “فرج” وهي كلمة نابية لدى اهل الشام.
واعتبر قصار ان ما فعله تيم حسن اصاب الشخصية بخلل كبير قائلا له: “عم تعمل خلل كبير يا حبيب، بضرك إلك اول شي، مشان ما يصير فيك متل غوار وحسني وياسينو لما النمط يبلع الممثل ويصير أكبر منو، وتصير محاولات الخروج من هي النمطية عبثية وغير مجدية”.
ومما قاله ايضا للممثل السوري: “مالح قلك خود أذن، لح قلك أستشير قبل ما تعمل هيك شغلات..”
واتهم الكاتب قصار الفنان تيم حسن بمحاولة سرقة الاضواء بشكل غير مباشر حيث قال له: بالشارة كاتبين تيم حسن في الهيبة، استاذ تيم حبيبنا بدنا نبطلها ونوزن شوي، ما حلوة في عالم كتير عم تشتغل وبتاخد العقل ومو شغلتها تدور بفلكك”!
وفي التفاصيل، كتب الكاتب السوري أحمد قصار، الذي شارك في كتابة سيناريو مسلسل “الهيبة الرد” الذي يعرض حالياً على صفحته على “فايسبوك” رسالة مفصلة الى تيم حسن جاء فيها:
“ما بتذكر اني كتبتلك بالنص كلمة اسبت، وماتهكلو للهم ومنتهية، وفرج … الخ من مفردات نمطك القديم… بالمناسبة كلمة فرج تعتبر كلمة نابية عنا بالشام، وكل ما واحد بقول فرج بيجي وراها الرد فورا بجملة يلي عطاك يا تحت الدرج، فما حلوة كل ما عم تقول فرج الناس عم تجاوبك فورا”.
وأضاف: “المهم حاولت… لما بلشت كتابة، كسر نمطية الشخصيات بعدما كانت منمطة كتير ومستنفذة بالأجزاء الماضية، وكان عندي الرغبة بتحويل هي الأنماط لشخصيات ومنهن شخصيتك، ليكون عندهن صراع داخلي وبعد نفسي يلي بخلينا ما نتوقع ردات فعلن ويعطيهن تجديد على صعيد كل شيء وكي تصبح عملية التحويل هي من نمط لشخصية كان لازم اجراء تغييرات كبيرة بأحداث العمل وتعريض الأنماط لتحولات جذرية عميقة تنقل النمط لمكان تاني وكان القرار بشخصيتك تعريض نمط جبل لفقدان العائلة بشكل مأساوي قادر على تغيير سلوك النمط، وخلق شرخ كبير طلع معدن الشخصية الأساسي وحولوا لشخصية وكمان تجربة العيش في العزلة بين الجرود وهي مرحلة تطهير كبيرة تعرضتلها الشخصية وقدرت تغيرها وتيجي بشكل جديد ومعطيات جديدة ولغة جديدة وصار هاد الشي”.
وتابع: “انت كممثل كنت موفق بكل التفاصيل على صعيد الشكل وتغير الأداء الأنفعالي، اما انك بعد هذا الجهد بتحويل الأنماط لشخصيات تروح تستعار مفردات النمط القديم وتستعملها على الشخصية الجديدة بتكون عم تعمل خلل كبير يا حبيب، بضرك ألك اول شي، مشان ما يصير فيك متل غوار وحسني وياسينو لما النمط يبلع الممثل ويصير أكبر منو وتصير محاولات الخروج من هي النمطية عبثية وغير مجدية”.
وقال :”التحول يلي عملتو بالشخصية على صعيد الأداء منيح كتير بلكن رجعت تنمط حالك بمطارح ما كان لازم تعمل هيك مهما ضغطوا صناع النمط الفنيين يلي بعتقد حسب معرفتي فيهن ما بيعرفو يميزوا بين النمط وبين الشخصية. والحل انك تطلع من هذا النمط لتروح لشي جديد بحياتك هي انك تعمل شخصيات”.
وأضاف :”اما بالنسبة لبداية المسلسل بالشارة كاتبين تيم حسن في الهيبة، استاذ تيم حبيبنا بدنا نبطلها ونوزن شوي ما حلوة في عالم كتير عم تشتغل وبتاخد العقل ومو شغلتها تدور بفلكك، وكما قال محمود درويش “نرسيس ليس جميلاً كما ظنّ . لكن صُنَّاعَهُ ورَّطوهُ بمرآته.. ” يلا سلام تاني مرة وقت بدك ترتجل، مالح قلك خود أذن لح قلك أستشير قبل ما تعمل هيك شغلات، وكان لازم مدرب الممثلين ينتبه على هذا الشيء كونه شخص أكاديمي، لكن لا اعلم هل يستطيع أن يوجه لك ملاحظة”.
وختم قصار بقوله: “على فكرة انا أحبيت المسلسل وأحبيت شو عامل بس هيك حبينا نناغشك. وصراعك ضد هدف نبيل وهو محاربة صناعة المخدرات من أسس تحويل شخصيتك ولو صحلي أقتلك بالمسلسل انت وعم تحارب لتحقق الهدف كنت عملتك أحلى بطل تراجيدي لكن لا استطيع هذا باب رزق . بكل حب حبيب .. لاعاد تنمط حالك .يلا سلام نسيت اعطيك مثال توضيحي. شخصية عبود ما كانت نمط رغم انو هيك بتبين . فهمت علي ولا عيد يا سعيد .. انتهت الرسالة”.
- “الهيبة الرد” (الجزء الرابع من مسلسل “الهيبة”) يعرض حالياً عبر تطبيق “شاهد”، و”MTV” و”أم بي سي4″، و”اي آر ت”، و”رؤيا” و”السومرية”. يشارك في البطولة ديما قندلفت، منى واصف، اويس مخللاتي، عبده شاهين، روزينا اللاذقاني وعادل كرم.. اخراج سامر برقاوي. انتاج “صباح اخوان”.
شاركنا النقاش