وجه الفنان يوسف حداد رسالة مفتوحة الى “حركة امل” والى كل لبناني شريف، حسب تعبيره، ردا على بيان صادر عن الحركة مؤخرا، وعلى ما ورد في مقدمة نشرة الاخبار في محطة nbn ، التي شنت هجوما على رئيس الجمهورية ميشال عون، والتيار الوطني العوني ورئيسه جبران باسيل.
وخاض الفنان حداد في رسالته الطويلة في دهاليز السياسة اللبنانية، مدافعا فيها عن الرئيس والتيار الوطني، مستعرضا تفاصيل في السياسة والاقتصاد اللبناني.
ومما جاء في رسالة يوسف حداد التي نشرها عبر “فيسبوك”:
رسالة مفتوحة لأهلي واصدقائي بحركة امل، حركة السيد الكبير موسى الصدر وتعاليم الوطنية والمحبة والعيش المشترك ومعهم الى كل لبناني شريف مؤمن بالوطن، رسالة مكتوبة بمحبة وخوف من المخطط الجهنمي وانتو بتعرفوني..
سمعت بيان الحركة ومقدمة الnbn واتهام التيار بالكذب وتدمير لبنان وسرقة امال اللبنانيين واخدن لجهنم، وانو العهد اي الرئيس سبب الانهيار والتفقير والتجويع والغلا والفلتان والاحتكار وضياع الودايع وخسارة الليرة قيمتا، وبقاء النازحين والعمل ع توطين اللاجئين وسفك دم الابريا وافتعال حرب داخلية….
واضاف: انتو مصدقين انو العهد هو رئيس جمهورية وغرفة سودا وصلاحيات مبتورة منقوصة، وانو العهد مش كمان مجلس وزرا ومجلس نيابي وادارات ومديرين وقضاء وامن واقتصاد ومال…. بربكم انتو مصدقين هالبيان؟
مصدقين انو التيار اللي وقف جنب المقاومة وناسا من 15 سنة هو سبب كل مأساتنا..
مصدقين انو التيار اللي حلم رئيسو من يوم رجعتو من فرنسا يعمل اصلاح ويحارب الفساد ويحاسب الفاسدين ويبني دولة المؤسسات والقانون واللي وقفت كل القوى اللي كانت حاكما من التسعين هو السبب..؟
وتابع: مصدقين انو التيار منع انشاء معامل كهربا وبدو تبقى مافيا الموتورات؟
مصدقين انو مافيا الفيول والاستيراد من تلاتين سنة هني تيار ومش هني قدمو بمجلس الوزرا اكتر من خمس مشاريع تضرب هالمافيا وانرفضو وما انبحث فين..
مصدقين انو التيار هو اللي كان يأكد انو الليرة بخير والودايع محمية وحقوقنا محفوظة..
مصدقين انو التيار ساكت وحامي حاكم المصرف الازعر الحرامي اللي اهدر مع اصحابو وداعمينو عشرات المليارات، وقدم فذلكات متوحشة وبخشش ودعم مصارف ومع وزارة المال عطى 40 % فوايد وانو ما كان هدف الرئيس وضعو بالتصرف واحالتو للمحاسبة من خمس سنين وبلشت الخطوط الحمر والتهديد الخارجي والوعيد الداخلي..
مصدقين انو جبران حرامي وعامل بلفة وسمسرة بقصة البواخر وبالنهاية طلع حاطط بنود جزائية بعشرات الملايين بتحاكم اي متلاعب او مرتشي..
وبعد مطالعة طويلة ختم حداد بقوله:
“اذا مصدقين كل هودي وعارف انكن مش مصدقين ولا مقتنعين، خلينا نحنا نتحاور بمحبة ومنطق ونمنع العملا والخونة والمرتشيين وولاد السفارات يعمقو الخلاف لأنو كلنا رح نخسر والرابح مشروع فيلتمان الاسرائيلي..
لبنان الرسالة بخطر وما حدا معصوم عن الخطأ وما حدا بريء بالمطلق ودعوتي يمكن تتقابل ببعض السخرية وكل حدا يكتب جرايد رد وحقو بس شو منربح؟ اذا ما حكينا وتحاورنا ومنعنا الفتنة الحاضرة لتهجيرنا او قتلنا…
رسالتي لكل لبناني بدو وطن العدالة والحق والقانون..وطن علماني ….مدني..
المواطن يوسف شاهين الحداد”.
لقراءة المنشور كاملا افتح الرابط:
https://www.facebook.com/photo/?fbid=415019876861047&set=a.267225694973800
شاركنا النقاش