احتفلت المذيعة والمراسلة في قناة LBCI غريسيا أنطون يوم الجمعة الماضي بزفافها على جان مجاعص، في عرس اقتصر على حضور الأهل وبعض المقربين والأصدقاء.
ونشرت انطون فيديو من مراسم الزفاف في الكنيسة على حسابها على “انستغرام” ، وقد ظهرت فيه وهي تقرأ رسالة لعريسها امام المدعوين، تعاهده فيها في جو طريف بان تبقى نكدة، وبأن تساعده ماديا عندما تقبض راتبها بالدولار!
وارفقت هذا الفيديو برسالة مكتوبة روت فيها كيفية اتخاذ قرار الزواج سريعا، والتحضير له خلال يومين فقط. لافتة الى انها اوصلت عريسها في اليوم التالي الى المطار ، ليستأنف عمله خارج لبنان. واشارت الى انها افتقدت في العرس زملاءها في lbci.
وجاء في رسالتها المكتوبة على “انستغرام”: “نهار الجمعة نحنا وراجعين من افريقيا، انا ع لبنان وجان ع السعودية عن طريق دبي والبحرين صار ابشع ظرف.. كورونا غيّر كل الاجندا، والاجراءات ع المطارات كانت عم تتغير كل ساعة.. فاضطر جان بعد عذاب و3 رحلات بليلة وحدة ونومة بمطار من دون تلفونو، يرجع ع لبنان..
صح الرجعة حلوة بعد غياب.. بس بهالايام الشغل اولوية.. تبهدل، ونزل، وعلق ببيروت ولايرجع ع شغلو صار مضطر يسافر ع بلد تاني ينحجر فيه 14 يوم..
واضافت: أمام هالواقع سألني الاثنين اذا منبتّها ومنتزوّج الجمعة، وهوي بيجرب يسافر السبت.. ما فكرت مرتين.. وقررت ساندوه متل ما ساندني هالخمس سنين اللي قطعو..
بيومين حضرنا ابسط عرس.. عرس بيشبهنا.. صح المعازيم بينعدوا ع الاصابع.. والعيلة الكبيرة منها حدي ولا كل اصحابي.. ولا حتى زملائي بالLBCI، وهو كمان.. بس الله سهّل كل الامور وعطانا نعمة الفرح اللي لا يوصف والمحبة اللي كانت اقوى من كل الظروف..
وتابعت: انا باقية بلبنان، بشغلي وحد اهلي.. وقلبي معك وين ما تروح.. اليوم الصبح افترقنا ووصلتك ع المطار… صح .. بس انا دايما حدك حتى لو من بعيد.. وبوعدك نفّذ كل شي قلتلك ياه ببيت الرب!
وكان زملاء غريسيا انطون قد احتفلوا بها في قسم الاخبار في “LBCI” لمناسبة زفافها.
شاركنا النقاش