القاهرة: دعاء حسن|
طمأنت الإعلامية لميس الحديدي الجمهور على الحالة الصحية للإعلامي عمرو أديب، بعد تعرضه لحادث مروري مساء الثلاثاء الماضي.
وقالت الحديدي عبر برنامجها “كلمة أخيرة” على قناة “ON”: “عاوزة أطمن كل الناس اللي بتسأل على عمرو بعد الحادثه الصعبة اللي تعرض لها، أنه الحمد لله بخير بشكل عام ربنا نجاه بأعجوبة الحقيقة، لأن العربية اللي خبط فيها واللي وقفت فجأة، كانت محملة بانابيب بوتاجاز (عبوات غاز) فكان ممكن تنفجر في أي لحظة”!
تابعت: “الاطباء طمنونا علي حالته عموما، لكن هو لسه بيعاني من الام مبرحة غالبا من الكدمات والرضوض، نتوقع انها تاخد بعض الوقت، وإنشاء الله يحاول يرجع لجمهوره قريبا بإذن الله، لكن هو محتاج يستريح شويه علشان يقدر يرجع تاني. وانا طبعا ماكنتش هقدر انزل الشغل او أكون معاكم إلا وأنا مطمئنة عليه انه بيتماثل للشفاء، وأن حالته تسمح أني اسيبه بعض الوقت، لأن في مثل هذه الاحداث دوري كزوجة بييجي قبل دوري كإعلامية “.
ووجهت الحديدي الشكر للجمهور وكافة المسؤولين في الدولة وللزملاء الاعلامييين على اهتمامهم وسؤالهم عن اديب.
كما كشفت لأول مرة عن هوية أربعة شباب كان لهم دور كبير في نقل زوجها الاعلامي عمرو أديب للمستشفى وإنقاذه قائلة: “وأخص بالشكر اربعة شباب بالاسم، لأنهم هم دول اللي نقلوا عمرو المستشفى بعد الحادث مباشرة، وفضلوا معاه لحد ما انا وصلت مباشره بعد الحلقة، الشباب دول انا ما اعرفهومش، لكنهم تصادف وجودهم في نفس مكان الحادث ونقلوه المستشفى و فضلوا معاه لحد وصولي، وكملوا معايا لحد ما اتطمنوا عليه. الشباب دول أنا صممت اخد أساميهم علشان اشكرهم بنفسي، فيه لسه ناس محترمه بجد”.
في جانب آخر، كانت مجموعة قنوات mbc ” قد أعلنت عن غياب الإعلامي عمرو أديب عن تقديم حلقات برنامجه “الحكاية” الذي يعرض يومياً من الجمعة إلى الاثنين في العاشرة مساء، ولم تحدد بعد موعد عودته، ومن المتوقع عودته لتقديم برنامجه يوم الجمعة المقبل.
وكان الإعلامي عمرو أديب تعرض لحادث الأسبوع الماضي في منطقة دهشور، ما تسبب في تهشم واجهة سيارته، ونقله إلى أحد المستشفيات في مدينة السادس من أكتوبر.
شاركنا النقاش