اثر الجدل الذي اثير حول ظهور المخرج خضر محمد خضر وهو يحمل حذاء زوجته، ياسمين أبو النجا (ابنة الفنانة نجلاء فتحي)، على السجادة الحمراء “لمهرجان الجونة السينمائي”، علق خضر بقوله: “واحدة شايلة بيتي على راسها 15 سنة، مش هاشيل جزمتها 15 دقيقة؟”
وفي هذا المجال، أصدر خضر محمد خضر بيانا عبر “فايسبوك”، جاء فيه:
بالنسبة للصورة بتاعتي أنا ومراتي، الصورة ديه اتاخدت واحنا مروحين الساعة 1.30 صباحاً من حفل الافتتاح، مش وإحنا داخلين حفل الافتتاح، أكيد مش هدخل حفلة شايل جزمة مراتي وماشي!، إحنا الدعوات بتاعتنا دعوات VIP مش دعوات مشاهير، فده أصلًا ما بيدخلناش على السجادة الحمراء مع الفنانين، ده بيدخلنا من باب تاني جنبه، ما فيهوش كاميرات.. كل ما هناك أن بعد 6 ساعات من الحفل، وإحنا خارجين باب الخروج كان زحمة وكل الناس خارجه منه، فنانين وغير فنانين ومصورين وكاميرات فيديو”.
وتابع “ومراتي أكيد بعد 6 ساعات رجلها تعبت زي أي واحدة رجلها بتتعب في أي فرح.. فقلعت الجزمة! فمن الطبيعي ومن الرجولة ومن الأدب إن أنا اللي أنزل اجيب الجزمة مش هخلي مراتي توطي وسط الناس أكيد، وديه لا حاجة تعيبني ولا تقلل مني.. واحدة شايلة بيتي على راسها 15 سنة، مش هاشيل جزمتها 15 دقيقة؟”
واضاف: “المهم ضربت بعيني لقيت ممر السجادة الحمرا مفتوح وفاضي قولت لها ياللا نخرج من هنا أسرع، ولقينا المصور العزيز محمد حامد، بيطلب مننا صورة فوقفنا 3 ثواني بالظبط.. ابتسمنا واخدنا الصورة وخلعنا.. والراجل تفضل مشكورًا وبعت لي الصورة على فيس بوك وبصراحة الصورة لذيذة.. ولما حطيتها عندي على الوول لقيتها بيتعمل لها شير روحت قافلها “للأصدقاء فقط” بس كده”.
وتابع: “الناس اللي بتسأل أنا إزاي في المهرجان بعد المشاكل “أنا بفضل ربِنَا وبفضل دعواتكم”، أعلنا السنة اللي فاتت والجرايد كتبت وأنا كتبت واحد المنظمين طلعت في التلفزيون، وقولت عملنا عقد تصالح مع محمد خضر، خلاص وأخد حقوقه، وبقى ضيف شرف المهرجان كل سنة والسنة ديه اسمها سنة الصلح خير.. وديه تاني سنة ليا في المهرجان كضيف شرف، أنا ومراتي.. وشكرت عندي عالفيسبوك كل الناس اللي وقفوا جنبي، وتمنياتي بالتوفيق لمهرجان الجونة”.
وكانت الدورة الرابعة من مهرجان الجونة السينمائي قد افتتحت مساء الجمعة في 23 تشرين الاول (كتوبر)، وسط تدابير احترازية للوقاية من فيروس كورونا، وبمشاركة عدد من النجوم من مختلف أنحاء العالم.
شاركنا النقاش