القاهرة: دعاء حسن|
بعدما قررت كل من إدارة شبكة قنوات “الحياة” ونقابة الاعلاميين بوقف برنامج “صبايا” ومقدمة البرنامج ريهام سعيد، على خلفية انتقادها اللاذع لأصحاب السمنة المفرطة في برنامجها “صبايا”، الذي يعرض عبر قناة “الحياة” ، نشرت ريهام سعيد فيديو عبر صفحتها الرسمية على موقع “فايسبوك” اعلنت فيه اعتزالها مجالي التقديم التمثيل.
وقالت ريهام: “بما إن هناك حملة ممنهجة من خلال المواقع اللي بتنزل كل ٣ دقائق حاجة من الصبح تقوّم بيها الناس عليّ، فمجرد أن يقرأ أحد أنني أهنت الناس البدينة ومرضى السمنة، وبما إننا شعب بيكسل يقرأ ويشوف، فبيصدق على طول ويزيط مع الزيطة ومش مهم بقى الست دي حالها وعيالها.. مش مهم بقى.. مش مهم نكذب ونصدق الكذبة.. المهم إن أي حد ساهم في وقفي النهارده من الصحفيين والمواقع هم ناس بتكذب لأني مقلتش ولا حاجة.. والله العظيم ما قلت ولا حاجة.. كل الناس اللى بتكتب تعليقات تحت الأخبار في المواقع واضح إنها سامعة وحافظة مش فاهمة”.
وتابعت: “مفيش حد شاف الحلقة، مفيش حد شاف أنا قلت إيه، كل الناس بتردد لبعض كلام أنا ما قلتوش.. كل اللى قلته إن التخين شكله مش حلو ومش قادر يمشي على رجليه وعايش ميت.. في واحدة كاتبة إني قلت ملهوش حق في الحياة، وناس تقول إني أهنتهم.. لكن كلمة عايشين ميتين دي هم اللى قالوهالي، وبتكلم على الناس اللى فوق الـ٢٠٠ و٢٥٠ كيلو”.
واضافت: “أنا بعتذر لكل الناس اللي زعلت مني عن سوء فهم، لأني لم أقصد إني أهين أي حد.. ومش بعتذر عشان أرجع للشاشة تاني، أنا خلاص مش هشتغل في الإعلام تاني ولا التمثيل تاني، لأن أخطر حاجة على مريض السمنة وكل حاجة هو الضغط، وأنا بقالي ١٦ سنة مضغوطة”.
واكملت: “جاء الوقت اللي أرتاح فيه وأقعد مع أولادي وأخلي بالي منهم، وأقعد مع جوزي ونقرب من ربنا.. ١٦ سنة بخدم الناس بس ونايمة بفكر مين عايز فلوس.. مين عايز كيس دم، ومعملتش فلوس وكانت نيتي خالصة لله- سبحانه وتعالى- عمري ما تربحت مرة ولا أخدت فلوس مرة.. عشت بضمير حي وراس مرفوعة”.
وأكملت ريهام قائلة: “الناس اللي بتقول أنا غلطت كام مرة.. أنا عمري ما غلطت ولا مرة.. لكن عشان ببقى ناجحة قوي ومسمعة قوي بتحارب، زي الواحدة اللي راحت أجرت لي واحدة وخدوا فلوس قد كده وتطوير واترميت في السجن ٤٥ يوم ظلم.. لو أرجل راجل في الدنيا ميستحملش اللي استحملته نصف ساعة.. أنا اتبهدلت واتظلمت.. أنا عايزة أعيش حياتي كويس.. أنتم خدمتوني النهاردة، كل واحد علق تعليق مش كويس، واللي ألّف تأليفة أنا ما قلتهاش، لأنكم فوقتوني وعرفتوني إني لازم أعيش لنفسي وأولادي.. كفاية كده”.
وأضافت: “كفاية بهدلة بقا.. الواحد لازم يعيش بكرامة، وإحساس الظلم ده وحش قوي، كفاية بقا تعبت، خلاص بقا”.
قرار ايقاف ريهام:
وكانت إدارة شبكة قنوات “الحياة” اعلنت أن مجلس الإدارة قد اتخذ قرارا بوقف برنامج “صبايا” ومقدمة البرنامج ريهام سعيد، مؤكدة في بيان إعلامي انه من المقرر ان يستمر الايقاف إلى حين انتهاء تحقيقات “المجلس الاعلى للاعلام” معها، ويتم إعلان موقف البرنامج وفقا لما ينتهي له الأمر. كما اكدت احترامها لكافة مشاهديها، متعهدة بدوام تقديم المحتوى المميز واللائق بجمهورها.
وفي السياق نفسه، قررت نقابة الاعلاميين برئاسة النقيب رسمياً منع ظهور الإعلامية ريهام سعيد ، وكذلك وقفها عن ممارسة النشاط الإعلامي، على خلفية تصريحاتها الأخيرة حول اصحاب السمنة.
كما خاطبت النقابة مجلس إدارة قناة “الحياة” بعدم ظهور الإعلامية على الشاشة مرة أخرى لحين تسوية أوضاعها. وأبلغت النقابة أيضا النيابة العامة بالتحقيق مع ريهام سعيد، لممارستها النشاط الإعلامي بالمخالفة لقواعد القيد بالنقابة.
وكانت ريهام سعيد تعرضت لانتقادات حادة عبر مواقع التواصل الاجتماعي بعدما صرحت خلال برنامجها ان مرضى السمنة المفرطة ما هم إلا عبء على عائلاتهم والدولة، بالإضافة إلى أنهم يشوهون المنظر العام بسب العرق والسموم الموجودة في أجسامهم. فشن عليها رواد مواقع التواصل الإجتماعي هجوما كبيرا، لغضبهم الشديد من تصريحاتها، حيث قام الناشطون بنشر صورتها عندما كانت تعاني من زيادة في الوزن في بداية مشوارها الفني وخضعت للعديد من عمليات التجميل. كما انتقدها عدد كبير من الاعلاميين والمشاهير منهم زينة وتامر حبيب وانجي وجدان…
شاركنا النقاش