القاهرة: دعاء حسن|
بعدما كشف المطرب والملحن رامي جمال عن إصابته بمرض “البهاق”، تلقى موجة حب وتضامن من قبل مجموعة كبيرة من الفنانين، وخاصة ان رامي تعاون مع عدد كبير من المطربين كملحن.
وكان رامي جمال أعلن عبر حساباته المختلفة عن مرضه قائلا: “الحمد لله الذي أحبني فابتلاني واقدرني على الصبر، من فترة ظهر بقع بيضا في جسمي، وبالكشف عرفت أنه البهاق وجربت أنواع علاج كتير ودكاترة كتير ومفيش فايدة، رضيت وسلمت أمري لله عشان عرفت أن الزعل بيزوده وكفاية شغلانتي وصعوبتها والقلق الدائم من المستقبل”.
وأضاف: “بقى بيزيد لدرجة لفتت نظر ناس كتير اللي بقي يقوللي هتتعامل إزاي وأنت فنان واللي يخاف يسلم واللي يسألني هو ده معدي؟.. أنا بقالي سنة فعلا لو عندي حفلة أو تصوير بتعب على ما أشوف طريقة أخفيه بيها، الحمد لله على نعمة الأهل لأنهم الوحيدين اللي بيقبلوا الواحد زي ما هو، طولت عليكم بس قلت أشرككم في حياة فنان”.
وفور إعلانه المرض، تصدر اسم رامي جمال مواقع التواصل الاجتماعي، وانهالت التعليقات من قبل محبيه والفنانين، حيث وجه له تامر حسني رسالة قائلا: “إلى الفنان الكبير والصديق الحقيقي والمحترم رامي جمال، يا حبيبي انت فنان كبير ومحبوب وليك قيمتك وكل الناس بتحبك ومفيش حاجه هتعطلك عن نجاحك، وتعبك دا لاهو مؤذي ولا مُعدي وكل الناس جواها تعب في منه اللي ظاهر وفي منه اللي مش ظاهر، حتى لو كان تعب نفسي او مادي كل شخص جواه وجع من حاجة معينة، المهم اننا نبص ونتعلم من اللي ظروفهم اصعب مننا ورغم كدا عندهم صبر وبينجحوا في الإختبار وبيقولوا الحمدلله ومكملين وعندهم إراده بينجحوا اكتر من الأول”.
وتابع: “لازم تكمل نجاح يا رامي وشيل اي هلاوس من دماغك، واوعى تخبي نفسك، اللي بيحبك بيحبك لشخصك وفنك صدقني دي حاجه عاديه يا رامي والله ملهاش اي تأثير لا عليك ولا على جمهورك بالعكس، بقى انت اكيد شايف الناس كلها طيبين ازاي ونفسهم يفرحوك وبعدين إفتكر ان مايكل چاكسون جاله نفس اللي جالك وبقى اسطوره مبتتكررش خاااااص، وانت فنان و عارف …انا واثق انك مؤمن وبتحمد ربنا وهتقوم وهتكمل وهفكرك قدام كل الناس اللي شايفه كلامي انك هتنجح اكتر و اكتر وربنا هيكرمك اجمل كرم وهتشوف قريب
بحبك يا رامي”.
ووجهت أيضا اليسا رسالة لرامي قائلة: “ممنوع تغيب وممنوع يكون البهاق عذر لغيابك. إنت بتقول ابتليت بالبهاق، بس مش سبب لتخاف وتغيب. في ناس ابتلت بالكذب والخيانة والسرقة وما هزت. وجودك أساسي ومتل ما إنت بتقول: أصل الحكاية مش حماية “شكل”… حكاية روح”.
وكتبت زينة: “انسان محترم ربنا يعفوا عنك …للاسف احنا في دنيا ما بترحمش والناس بقت صعبه، يا ريت نحاول يكون في قلوبنا رحمة” .
وتابعت: “انت انسان موهوب يمكن انا ما تشرفتش بمعرفتك، بس قلبي معاك واوعى تفكر تتهزم، ده مرض عادي وربنا يعفوا عنك، وقول الحمد لله والناس الرحيمة كتير، واعتبرني من أهلك والإنسان بموهبته واحترامه وأخلاقه وبس”.
لطيفة أيضا وجهت رسالة دعم لرامي قائلة: “حبيب قلبي يا رامي يا مبدع يا محترم يا مختلف، اوعى تفكر كده أول حاجه لازم تقول الحمدالله على كل حاجة، دي مرض حصل لناس كتير وتعالجت منها الحمد الله، وبعدين أحنا بنحبك على موهبتك وفنك الرائع وكل جمهورك وأنا منهم بنبقى مستنيين جديدك دايما”.
وكتب أحمد زاهر قائلا: “حبيبي يا رامي انت اقوي من أي مرض واحنا كلنا بنحبك وهانفضل نحبك مهما حصل، واللي بيحب حد يقبله علي اَي وضعو. مستنيين أغانيك الجديدة يا فنان يا جامد”.
شاركنا النقاش